Viser innlegg med etiketten hobbyprosjekt. Vis alle innlegg
Viser innlegg med etiketten hobbyprosjekt. Vis alle innlegg

tirsdag 24. februar 2015

Karoline-rommet





Det er kjekt å innrede. Men det tek si tid å finne dei rette løysingane, og dei rette møblane. Det skal harmonere med huset og med oss. Her er det tatt i bruk to pensjonatsengar frå "Hoff Pensjonat", det same gjeld nattbordet.


Vi har fokus på å bruke det vi har. Vi likar gjenbruk og oppussing. Litt nye tekstilar må til også, og då må kanskje symaskina fram, for å få det slik vi vil.

 

Her har ein riktig gammal, heimesnekra stol, som har stått ute eit par år, fått "nye" puter, dvs gamle, ny-omtrekte puter, ny-sydd trekk på puta i stolen, og gode, lune skinn. Faktisk enda eit gammalt vrak opp med å bli både innbydande og god å sitte i. Nett slik vi likar det!


Ei gammal seng kom fram frå eit loft. Ei tønne til nattbord. Eigenprodusert lappeteppe i senga, reste-og gjenbruksstoff, sjølvsagt. Ei pute fekk sydd på ei heklebord som låg på lur i eit skåp. Også ei arva brodert pute fekk plass i senga. Likeeins ei arva, vevd pute på krakken ved sida av.


Eit lite bord har vi også fått plass til. I hjørnet står eit gammalt tørkestativ med ullpledd som kan vere gode å ha både ute og inne om ein vil varme seg litt.


Her ein gammal vaskekommode frå ein gjenbruksbutikk, den fekk vi tak i for nokre år sidan. Denne er pussa opp, for den var verkeleg stygg i utgangspunktet. På den står det eit gammalt vaskestell frå "Hoff Pensjonat".


Denne senga er av nyare dato, men med litt "justeringar" glir den bra inn i miljøet. Lamper frå ein gjenbruksbutikk i Sverige er på plass over senga.

Slik ser det ut så langt, no begynner det å bli triveleg.

Under kjem bilder av dette rommet då vi starta på flytte- og restaureringsprosjektet. Og det skal seiast, dette rommet var  det som var best i stand, sett vekk i frå taket, då ;-)





tirsdag 4. mars 2014

Prosjekt storehus!


Etter å  i lang tid ha vore på utkikk etter eit eldre hus som vi kunne flytte til og restaurere her på Flatheim. Var "løysinga" nærare enn vi hadde trudd. 6-7 kilometer frå oss sto dette huset. Huset er den type hus som gjerne var på dei største gardane i distriktet her, og som vart kalla storehus. Det vart brukt som lager av ymse, og også som hus til arbeidsfolk og andre gjester om sommaren. 


Eigaren av huset hadde ikkje kapasitet til å ta seg av det, og var villig til å selje.


Huset var prega av forfall, og ein takreparasjon som var gjort på 80-talet var ikkje så vellukka som eigaren hadde håpa, så taket hadde store lekkasjar. Vi såg at tømmeret var nokolunde, og det såg ut som vi kunne klare å gjenreise det, med litt utskifting av "deler", og tak sjølvsagt.

Så var det riveløyve. Ein lang prosess. Kommunen sende det over til fylkeskommunen pga at huset kunne ha ein høg alder. Etter mange synfaringar, og lang tid i tenkeboksen, konkluderte fylkeskommunen med at løyve til riving og flytting vart gjeve. Dei vurderte det slik at det ellers var svært sansynleg at huset ville gå tapt. Det hadde allereie store skadar, som vi bremsa nokre år med presenningar på taket. Eit vilkår var at vi fekk tidfesta alder på huset ved dendrokronologisk datering. Dette måtte gjerast i demonteringsprosessen, for å komme til å ta boreprøvar frå rett side av tømmeret. Og at huset sjølvsagt skulle restaurerast mest mogeleg antikvarisk, noko som også var vårt ynskje.


Etterkvart kunne demonteringa starte.


Taket var så rote, at vi måtte leige lift for å komme til nokolunde trygt når det skulle takast ned. Faren var ellers stor for å rase rett igjennom.


Tømmeret synte seg å vere i overraskande god stand, og skadane var ikkje så store som vi gjerne først tenkte.


Demontering.


Merking av tømmer


Ny tomt


Mykje reingjering! Her skurar vi golvbord. Huset har vore nytta til blant anna salting av kjøt. Så i eine rommet er det ein del saltskadar på golvet. Dette er ei nøtt, så om nokon har tips til korleis vi skal få det golvet så bra som mogeleg, så tek vi imot med takk. Førebels har vi lagt nedatt golvet, og vi har prøvd med eddik, som nokon har sagt skal nøytralisere saltet. Førebels usikker på effekten av det.

Etterkvart som døra i huset gjekk ut av sine glansdagar, hadde huset vorte tilgjengeleg for blant anna sauer, så det var mykje skit som skulle vekk ;-).


Her er huset godt på veg i gjenreisinga.


Juksa litt med traktor og frontlastar.



Før vinteren kom vart taket tett, og etter at vi såg at regn kombinert med vind, gjorde at tømmerstokkane vart gjennomtrekte med vatn, så vart det også presenningar for å beskytte veggane inntil kledning kjem på. 

Viktig å få det luftig på same tid, slik at sopp og mygl held seg unna. Men vinteren har forsåvidt vore ein samanhengande storm, så ikkje problem med luft for å sei det slik.


Vi har putla på litt innvendig når ikkje kulden har vore for hard. Litt "standardheving" må til, slik at vi kan ha ein noko meir utvida bruk og nytte av huset enn det opprinneleg var som storehus. Difor blir det lagt isolasjon i golva.


Mykje reingjering. Vasking og skuring av tømmerveggane er heilt nødvendig. Nokon som vil vere med?? ;-)
Det står fortsatt mykje att!


Legg merke til gardintrappa. Står heilt i stil med huset, gamal, god og heimelaga!

Fortsettelse fylgjer!

lørdag 14. april 2012

Påskegåve


Vesle, nye nevøen skulle komme på sin første påskeferie til Viksdalen. Då måtte han sjølvsagt få krabbeteppe. Lenge sidan symaskin, stoff og saks har vore framme no. Men "gamle" kunster sat fortsatt i ;-). Teppet er sydd av lappar frå gamle dukar, gardiner, stoffrestar og gamle dongeribukser. Gjenbruk slik eg likar det. Det einaste nyinnkjøpte for anledningen er fleecestoffet til kanting og bakside (eller framside om ein vil). I same slengen blei det klipt opp lappar til 4 slike tepper til og i tillegg blei det sydd eit sengeteppe til ei voksenseng, som eg skal vise fram seinare ettersom eg manglar platevatt til foring, så det er ikkje heilt i boks endå.

God helg til alle. Her blir det 4H-møte med alle 4H-gardane og klubbane i bygda på ettermiddagen. Blir spennande å komme i lag å samkøyre planar og aktivitetar. I morgon blir det 100-års dag i Balestrand. Det er ikkje så ofte ein får sjansen til å vere med på. Sjølv om Ronja på 9, faktisk har vore i 100-års dag før. Iallefall ein alder det står respekt av

søndag 12. februar 2012

Trang for oppdatering....


Dristar meg til med eit lite interiørinnlegg. Det blir heller lite av det, sjølv om planane er der. For det er alltid slik at når ein ser ting gjennom linsa, då ser ein alt som ein har tenkt å rette på, eller som ein ikkje er heilt fornøgd med. Eigentleg ein fin måte å få augene opp for ting ein har sett seg blind på, både innomhus og utomhus ;-)!

På bilde over ser de ei tallerkenhylle som eg og mannen laga i haust. Eg hadde lenge snusa litt rundt etter ei slik hylle, men fant aldri noko som passa med pris, eller størrelse, så til slutt fann eg ut at det var berre å setje igang sjølv. Det føregår slik at eg teiknar og føreslår korleis det skal sjå ut, er som oftast med på materialhandel eller leiting i eige lager (som snart er oppbrukt), mannen snekrar og sagar stort sett, Til slutt er det min tur å svinge malarkosten. Sjølv om alle no skal ha det meste kvitt, så vart det ikkje det her i garden. Det vart faktisk stikk motsatt, svart!

Her har eg plassert alle mine fargeglade koppar frå Greengate og dei få eg har frå PIP. Blir litt glad av å sjå på denne hylla med glade fargar. Og så er det slik at eg kan velge ein ny type kopp kvar gang eg skal drikke ein kaffelatte eller ein kopp te. Små gleder er viktig det!



Noko som også er komme i hus i løpet av dei siste månadane er desse fantastisk fine boksane. Eg er meget glad i gamle, fine boksar. Endå eit innslag med glade fargar! Den blå rommar flatbrød, heimelaga av ei tante, -og eg skal snart manne meg opp å teste flatbrødbakeevnen sjølv har eg tenkt. Så då kan det bli påfyll. Den gule boksen rommar ymse snacks som av og til kjem i hus, og ellers ikkje har nokon fast plass. For snopehylle eller snopeskuffe, det har vi ikkje ;-).

Ha ein fin søndag. Her er dei fleste ute på ski, unntatt meg som ikkje er i "optimal" form kva dag, og den av sønene som er "friskast" i bakken, men som blei litt for tøff i går, -han kom forsåvidt bra ifrå det, men ein dag uten skisko og full fart opp ned og bak fram er truleg påkrevd ;-).

Ha ein fin søndag og morsdag!  Vurderer litt vaffelsteiking ut på ettermiddagen, -men er litt i stuss om det er mi oppgåve i dag....


torsdag 15. juli 2010

Sommarproduksjon, sommarturistar og sommarstæsj




I sommar har vi opna oppatt ein flik av det gamle pensjonatet og prøver oss som turistvertar att. Kjekt det! Litt folk har vi hatt innom. Spennande å sjå kven som ferierer på denne måten, berre stoppar når dei ser eit skilt i vegkanten. Har ofte eit inntrykk av at alle er så organiserte no til dags, alt skal vere "tima" og tilrettelagt på førehand....
Vel, iallefall, vi prøver dette i år. I vegkanten står det eit ordinært "Rom"-skilt, men på trappa har eg i tillegg laga nokre skilt av rekved frå Solund. Det er ei utfordring å halde tunet og trappa ryddig og pent, slik at det er innbydande for turistar å stoppe, når ein har eit lass med ungar som har skulefri og mange slags prosjekt i løpet av ein dag. I tillegg til at vi andre også kan styre med ymse igjennom ein dag.

Vart freista til å handle litt hos Hilde Heimdal for nokre dagar sidan. I dag kom det pakke. Litt koselege overraskingar var også med i pakken. Tusen takk. Nokre veggord var bestilt, og nokre kom i bonus. Dette har fått plass på innsida av ytterdøra. Vart no litt koseleg, syns eg. Skal syne meir av stæsjet frå den pakken ein annan dag...


Det har vore eit svært blanda ver denne veka. Så mandagskvelden drog eg fram symaskin og stoff som har vore klar lenge. Og som vanleg når maskina er framme, så begrensar eg meg ikkje. Plutseleg hadde eg produsert fire kjolar. I dag hadde eg tenkt å ha fotoseanse i hagen. Men med torden, storm, flobyger, sol og skodde, så vart det kveld før eg fekk gjort det. Lyset var då heller dårleg for fotografering, så fargane kjem ikkje til sin rett.








Ein liten jentekjole til Ronja Røverdatter. Ho syns først den var litt rar, og ville helst ha fotsid, men når kappa kom på, så vart kjolen akseptert!




Ein voksenkjole i turkis velour med englebilde frå Barbro.







Ein voksenkjole i svart og lys blå velour med hjerteapplikasjoner.







Og så ein kjole til mor som matchar Ronja sin, det blir litt morsomt å sprade rundt i ;-)!














I morgon er det siste vakt på jobb, så er det fire veker ferie. Dei kjem til å gå altfor fort, men det er jo vanleg med sommaren, den går unna!


søndag 21. mars 2010

Lys ute og lyst inne og eit par ferdigstilte UFO'ar





I går kveld vart lyset tent i skibakken vår for første gang. Eg kunne nesten klare meg utan lys på inne i stova. Ungane heiv på seg skia og la avgårde bort i bakken for å prøve.



Eg måtte sjølvsagt prøve å få det på eit foto, ikkje særleg vellukka, men ser jo at det har noko med lys å gjere ;-)










I går var også dagen for ferdigstilling av uferdige objekt (UFO'ar), for no skal symaskina ryddast vekk frå spisebordet, og andre førebuingar skal starte. Neste veke skal vi ha skirenn her, om snøen held. Dessutan har eg ei fordjupningsoppgåve som ligg å ropar på nye velformulerte setningar. Og eit par selskap nærmar seg også så smått. Puta over vart laga av eit øydelagt putetrekk med eit fint broderi på som fortente eit nytt liv.







Eit gult, påske og sol-inspirert krabbeteppe har vore påbegynt nokre veker. Det er skikkeleg irriterande å ha slikt liggande, så det var berre å kaste seg over det.













Hadde også laga eit strykemerke med sauer og lam på, som passar godt no framover våren her på Flatheim. Dette vart ei pute i full fart.







Hamskifte fortset. Under opprydding av spisestova fekk dei mørke gardinene fyken der og. Nye kvite gardiner, kvite roser, og litt omflytting på stæsj og anna, -og vips stova har fått eit nytt uttrykk. No kan våren komme, dvs neste fredag, etter at skirennet er ferdig ;-).

















Slik så det ut her før vårhabitten kom inn.



fredag 19. mars 2010

Fra vinter til vår

Det er på tide med hamskifte på Flatheim.

Dette brukar å skje kvar vår rundt påsketider.

Først ut er tv-stova.

På vinteren brukar vi nemleg ofte å "lune" det litt med litt mørkare fargar på gardiner og tilbehør.

Men når våren og lyset kjem, blir det heilt feil. Og trangen kjem dessutan til oppfriskning.


Slik har det sett ut i vinter.









Og slik ser det ut no, gardiner, puter og pledd har fått fyken. Og fram frå skap og andre lure plassar har det blitt henta fram lys habitt. Eigntleg hadde eg tenkt å sy eit nytt "lappepledd" for anledningen. Inntil vidare har eg funne fram eit som var ferdigsydd, så får vi prøve med det litt. Det tar nemleg meir enn 5 minutt å sy eit nytt....


Dei sjølvlysande kvite bollande på bordet har eg sydd av strimler, dette måtte eg prøve etter at eg fekk ideen på bloggen Jannes Hobbykrok, ho svisjar rett som det er saman slike bollar på eit lite blunk. Og det såg jo litt artig ut, då..





Eg ser at eit skikkeleg kamera hadde vore heilt på sin plass. Ingenting kjem heilt til sin rett med det utstyret som eg innehar for tida, men, men...









Påskeliljene har tjuvstarta litt her... Nye må nok inn når påska slår til for fullt.




Og eit lite bruktfunn til slutt. Eit litermål av den gamle gode sorten.

No å finne med ein eføy godt planta oppi ;-).





God helg!